八珍姨話你知：菩薩都冇情講！

八珍姨雖然年紀唔係細，但係都未大到停晒副偈，點都會有生理需要搵老公幫手解決（嫁畀佢時講明包埋架嘛！）。話說有一晚我專登著左件性感喱士睡衣，諗住過一個歡愉嘅晚上啦，點知個死佬一上床就同我講：我會做好呢份工！

一聽個人真係成身罄烚烚，即刻大嗌十八個字粗口（平時都冇嗌得咁落力咁迫真！），再問佢當我八珍姨係乜呀？點知佢再講：我都係想盡心盡力完成呢份工作啫！

聽完真係菩薩都冇情講！一腳伸佢出廳，叫佢去皇后碼頭度諗清楚先好返黎！

雖然嬲足晚成，但係第二日咪又係當冇事發生！鬼叫佢係我老公咩，有得揀咩？好彩佢唔係姓曾囉！